Det er berre det at utspelet kjem like etter at regjeringa godkjende
EØS-utvidinga med ny veterinæravtale med EU, rett nok utan at Dagsrevyen
fann plass til den saka. Og med all respekt for barnematen:
grensekontroll med matborne sjukdommar og dyresjukdommar er langt
viktigare. Ho gjeld maten til alle, medrekna små og store born, og ikkje
minst: ho handlar om å halde farlege smittestoff ute av landet. Reglar
for vitaminar i barnemat kan endrast att, men bakteriar som har slått
seg til her, kan ikkje fjernast med nye regjeringsvedtak.
Dette veit sjølvsagt Sp-leiinga. Det er pinleg for dei å godta
veterinæravtalen. Då vil dei heller snakke om noko anna. Barnemat-saka
er eigenleg ikkje "farleg" for EU-tilpassinga. Det skulle ikkje undre
meg om regjeringa har fått "lov" av Ap/H/FrP til å kjøre veto-løypa
fullt ut. Det er strategisk mykje viktigare for marknadspartia å få
gjennom veterinæravtalen.
Men også den kampen kan vinnast dersom Sp mobiliserer. Kan dei setje
hardt mot hardt i bispestriden og eventuelt i barnemat-saka, så kan dei
også gjere det her. Dei kan spele på lag med motstanden utanfor
Stortinget. Greier vi saman å tvinge marknadspartia til ein debatt om
saka, så har vi vunne, for det finst ikkje saklege argument for avtalen.
Lars Staurset